Yesu hawezi kutetewa na nguvu za Dola
Serikali, tafuteni sababu nyingine ya kupambana na Waislamu

Na Mwinjilisti Kamara Kusupa

MIMI ninayeandika makala hii ni miongoni mwa maelfu, malaki, mamilioni, mabilioni na matrioli au mazilioni ya wafuasi wa Yesu aitwaye Kristo. Ninaamini kwamba Yesu ni Mwana wa Mungu, na kwamba alikuja kwamba Yesu alikuwako kabla ya ulimwengu kuumbwa, na kwamba vyote vilifanyika kwa yeye, na baadaye neno alitwaa (alivaa) mwili akakaa kwetu wanadamu akaishi kama binadamu na akashiriki mambo yote yampatayo binadamu aliyepata kuishi dunia hii isipokuwa neno moja tu tofauti na wanadamu wengine yeye Yesu hakuijua dhambi.

Naamini ya kwamba Mungu ni baba yangu, na baba wa wote waliozaliwa upya kiroho na si kwa mapenzi ya mwili, kwaajili hiyo sioni haya kuukiri uungu wa Yesu hadharani nikiungwa mkono na Unabii wa Isaya ambaye alitabiri miaka mingi nyuma akisema: Huku kwetu amezaliwa mtoto mwanaume na jina lake ni: Mshauri wa ajabu. Mungu mwenye nguvu na Baba wa Milele. Yeye ambaye uweza wa kifalme u mabegani mwake. Hata hivyo, imani yangu hiyo haiwazuii wala haiwalazimishi Watanzania wengine au Waafrika wengine ama wanadamu wengine kuamini vinginevyo.

Wapo wanaoamini kwamba Yesu alikuwa Nabii tu wa Mungu, na wala si mwana wa Mungu, wapo wanaoamini kwamba Yesu hakuwa nabii bali alikuwa ni mwanadamu mwenye vipawa au "Charismatic Person" na pia wapo wanaoamini kwamba kitu kiitwacho Mungu hakuna. Wakomunisti kabla ya dini yao kuanguka walikuwa wakikiri hadharani kwamba Mungu siyo Mungu bali Mungu ni hakuna (opium) na kutokana na imani yao hiyo hakuna aliyewabughudhi kwamba wanakashifu dini za watu wengine waaminio kwamba Mungu yuko na ambaye yuko wala hakuna aliyewafunga kwa kuikiri imani yao hiyo hadharani. Maana ukweli na uhalisi wa mambo ni kwamba hicho ndicho kitendawili cha imani hakina jibu moja na dhehebu moja na Doctrine moja kitu ambacho hakitatokea asilani badala yake kinachotakiwa sasa ni sote tusubiri kwa uvumilivu mkuu hadi siku ya kiama ambayo ndiyo siku ya kuteguliwa kwa kitendawili cha imani, hapo tukapoona Mungu mwenyewe akiwalipa wanadamu kwa kadri ya imani zao na matendo yao.

Sasa muda wote tuwapo duniani hatuna budi kukubali kutofautiana na pia kukubali kutokubaliana. Ni kwa misingi hiyo ya kukubali kutofautiana ndiyo maana imani yangu hainizuii kuishi na Waislamu, kushirikiana nao katika mema, na hata kutumia magazeti yao ya kidini ambayo lengo na madhumuni ya kuweko kwayo ni kueneza Uislamu, kuutetea na kuuimarisha pale ulipolegea. Imani yangu haiwafanyi wale wanaoamini kinyume nami wawe maadui zangu, wala haiwafanyi Waislamu na wengine wanaoamini kwamba Yesu siyo Mungu, Yesu siyo Nabii au siyo mwana wa Mungu wawaone Wakristo kama maadui zao.

Katika nchi hii kama ungekuwako uadui wowote kati ya Wakristo na waumini wa dini nyingine, ama uadui kati ya Waislamu na wasio Waislamu, badi uadui huo ungeonekana maishani tangu enzi za mkoloni, hadi uhuru, hadi sasa. Kwa ajili hiyo lililo wazi ni kwamba mapambano yanayoendelea sasa kati ya Waislamu na serikali, hayatokani na imani yaani eti Waislamu wawe wanaamini tofauti na Wakristo wanavyoamini, ama Wakristo kuamini tofauti na wanavyoamini Waislamu kwani tofauti za imani zilikuwepo tangu mwanzo na zitaendelea kuwako hadi siku ya mwisho Mungu mwenyewe atakaposimamisha ufalme wake wa milele.

Sasa swali la kujiuliza kwa dhati ni hili, ni nini hasa kinachopelekea watu kufungwa ama kuwekwa mahabusu na kunyimwa dhamana? Narudia tena kukanusha kwamba imani kama ilivyo haiwezi kuwa chanzo cha vurugu au mapambano ni lazima kuna sababu nyingine iliyojificha nyuma yake. Binafsi naagizwa na maandiko yaliyoko kwenye Biblia kwamba tuishindanie imani tuliyopewa mara moja tu. Hii ina maana ya kwamba wakati wa mahala pa kuishindania ama kuipigania imani ya Kikristo ni duniani tu tena ni mara moja tu yaani katika atakuwa hana nafasi tena ya kuitetea imani au kigharamikia kwa namna yoyote. Lakini pia mafundisho ya Biblia yanaonya kwamba kushindana kwetu sisi au vita vyetu si juu ya nyama na damu, bali ni juu ya falme, na mamlaka na Roho wachafu katika ulimwengu wa roho. Ninachotaka kieleweke katika mada hii ni kwamba imani ya Kikristo kamwe haiwezi kutetewa na nguvu za dola, vinginevyo Yesu kama mwasisi wa imani yetu atakuwa hana cha kujivunia.

Wale wamwaminiao Yesu wataitetea imani yao kwa kutiwa nguvu na Yesu mwenyewe badala ya nguvu za dola ambazo wakati mwingine hutumika kuonea zaidi kuliko kutenda haki. Katika neno hili serikali isiufanye ukiri wa Wakristo kwamba Yesu ni Mungu mwenye nguvu iwe kisingizio cha wao kupambana na Waislamu, maana ukweli wa mambo ni kwamba Yesu kuaminiwa kama Mungu ama kuaminiwa kama Nabii tu hizo ni doctrine siyo issues za kuvuruga jamii ama kuitikisa misingi ya umoja na mshikamano wa nchi. Tatizo halisi ni kwamba serikali ya CCM ina chuki zake tena za muda mrefu dhidi ya Waislamu kwa sababu Waislamu wamekuwa wakiipinga wazi wazi kwa vile wao Waislamu dini yao inaruhusu wao kujihusisha na siasa.

Ni kutokana na upinzani huo ndiyo maana serikali ya CCM siku zote imekuwa na approach za ukali na ukatili unaoandamana na matumizi ya ziada ya nguvu za dola hata pale mahala pasipostahili kutumia nguvu za dola. Serikali ina chuki zake kwa Waislamu kwa sababu wanaipinga na si kwa sababu Waislamu wanampinga Yesu kwa kusema Yesu si Mungu. Kama huu ndiyo uhalisi wa mambo, basi nasema serikali itafute kisingizio kingine cha kupambana na watu inaowachukia, isitumie mgongo wa Ukristo kwani inajulikana wazi kwamba serikali yetu haimuenzi Mungu, wala haimuenzi Kristo badala yake inaenzi uchawi na ushirikina. Serikali iwayo yote haiwezi ikawa na huruma kwa Mungu lakini ikakosa huruma kwa raia zake, haiwezekani kabisa serikali ikamhurumia Mungu asiyeonekana, ama ikamhurumia Yesu ati anakashifiwa na Waislamu wanaosema Yesu si Mungu lakini wakati huo huo serikali hiyo ikakosa huruma kwa raia zake wanaoonekana ikawakomoa kwa kuwashitaki eti wameandamana na papo hapo kuwanyima dhmana ambayo ni haki yao ya kisheria! Yesu anao uwezo wa kuwainua watu miongoni mwa wale wamwaminiao, nao wakamtetea kwa hoja, kwa matendo ya miujiza na mahubiri yenye mvuto. Kwa ajili hiyo mapambano kati ya serikali na Waislamu yasinasibishwe na Ukristo kwa namna yoyote kwa kuwa ni mapambano ya kupigania na kuhami maslahi ya kidunia wakati ufalme wa Yesu siyo ufalme wa maslahi. Zaidi ya yote Muislamu anapoandamana na kusema wazi kwamba Yesu siyo Mungu, lugha ya namna hiyo haimpunguzii chochote Yesu katika ukamilifu wake. Maneno ya kwamba Yesu si Mungu hayamuondolei Yesu Uungu wake wala hayamfanyi asiwe Mungu, sawa kabisa na ukiri wa Wakomunisti wa kusema Mungu hayuko ambavyo haukumfanya Mungu aache kuwa.

Pia katika sakata hili la kuukana Uungu wa Yesu popote pale litakapoibukia Yesu mwenyewe atajipigania na kujitukuza kwa njia zake za kimungu na siyo za kidola. Na sasa tulitazame suala la maandamano, je kuandamana kama kulivyo kuna kosa gani? Kama Waislamu waliumizwa na hukumu dhidi ya Muislamu mwenzao aliyefungwa kwa kusema Yesu siyo Mungu kuna ubaya gani wa wao kuandamana na kuzieleza hisia zao kwa amani? Mbona mashoga wa Ulaya walimfanyia maandamano Rais Mugabe wa Zimbabwe kupinga misimamo ya serikali yake dhidi ya mashoga wenzao waishio Zimbabwe!! Kwa hiyo tatizo hapa ni ile kasumba ya Kikomunisti ya CCM ya kuona maandamano yoyote yasiyokuwa ya kibali cha serikali ni haramu na kwa sababu wao watawala wanayaona haramu hata mwandamanaji wanamwona kama ni mtu haramu ambaye hana thamani wala haki ya kuishi ndiyo maana wanasema na kuandika bila haya Muislamu aliyekatwa mguu ajutia kitendo chake cha kuandamana, kisa! Asema shs 2000 zilimponza.

Ni nani anayeweza kuhonga waandamanaji ili waelezee hisia zao? Kisha hata tukiichukulia hali hiyo iwe kweli kuwa mwandanamaji kahongwa shilingi 2000, je wewe unayemrushia bomu au silaha ya kumkata mguu maskini huyu una nini cha kujivunia katika utawala wako? Je waweza kuthubutu kujidai kwamba unao askari wakali sana kwa kuwa wanaweza kuwavunja miguu raia zako na kuwanyamazisha wasiandamane!! Ukweli na uhalisi wa mambo ni kwamba hizi ndiyo ishara na dalili za mwisho za serikali iliyoshindwa kazi. Maandamano mengi tunayoyaona leo yana uhusiano wa moja kwa moja na uchaguzi mkuu wa 2000. Wakati wa uchaguzi mkuu CCM ilitumia fedha nyingi sana ambazo haijulikani chanzo chake, matokeo yake ni kwamba baada ya uchaguzi imebidi serikali ifidie gharama za uchaguzi kwa njia ya kuminya kutoka kwenye huduma za jamii na mafungu ya maendeleo social services zimekufa na hizo zilizo hai zinazidi kudidimia siku baada ya siku, ajira haiongezeki na wasio na kazi wala shughuli maalum za kufanya wanazidi kuongezeka siku baada ya siku.

Haya ni matatizo ya kijamii (siyo matatizo ya imani) na ni wazi kwamba yana uhusiano na kutawala ulioshindwa kazi (umeshinda kwenye kura kwa kishindo lakini pia kwenye kazi umeshindwa kwa kishindo). Hivyo basi waandamanaji ni lazima waionyoshee kidole CCM kwa sababu ndiyo iliyokomba fedha yao wakati wa uchaguzi, fedha ambayo ilipaswa kuwaboreshea maisha lakini ikamwagwa kwenye mabango ya chagua Mkapa na picha mamilioni ambazo sasa zimesimama kama kejeli tu zikiwa na ujumbe ule ule Chagua Mkapa, Chagua CCM. Mtu asije kushangaa kwamba leo hii vyombo vya habari vinatangaza na kuandika juu ya ofisi za CCM kuchomwa moto baada ya maandamano ya Waislamu lakini kama atajitokeza mtu mmoja kisha akasema anaitisha maandamano ya kujibu kwamba Yesu ni Mungu, si ajabu waandamanaji wakawa wale wale na ofisi za CCM au vituo vya polisi vikachomwa moto.

Kwa hiyo siyo halali kuhusisha ulipuaji wa mabomu, au kuchomwa moto ofisi za CCM na Uislamu, ieleweke wazi kwamba katika nchi hii kuna Waislamu, Wakristo, Wahindu ambao wanayo haki ya kuelezea hisia zao na pia kuna dhehebu moja liitwalo dhehebu la Ulalahoi, hawa walalahoi wana uchungu usiokwisha na jeraha mioyoni mwao lisilopona kutokana na ukweli kwamba wamenyimwa kula mema ya nchi yao, hawa wanangoja itokee nafasi yoyote japo ya muda mfupi tu ili waonyeshe hisia zao. Sasa nasema ole wenu ninyi mlioiibia nchi mkajenga mahekalu yenu huko maeneo ya vigogo na wengine mkaficha fedha kwenye mabenki ya Ulaya!! Ole wenu mlotumia mabilioni kama gharama ya kuingia madarakani dhambi hiyo mliyoitenda itawatesa daima kwani sasa itabidi nanyi mzilipe gharama za kuweko madarakani.

Vita ya Kidini Tanzania?!!!